اسلام آباد۔27ستمبر(اے پی پی)وفاقی وزیر تجارت ڈاکٹر گوہر اعجاز نال نیشنل سٹیل دے سی ای او ضیغم عادل سٹیل انڈسٹری دے ھک وفد دے رلے ملاقات کیتی جیں دا مقصد پاکستان دے صنعتی منظر نامے دے اہم جزو سٹیل سیکٹر دی ترقی اچ آندیاں رکاوٹاں کوں ہٹاوݨا ہئی ۔ وزیر تجارت ڈاکٹر گوہر اعجاز سٹیل دی صنعت کوں سپورٹ کرݨ تے ایندی ترقی یقینی بݨاوݨ تے آپݨے عزم دا اعادہ کیتے ۔ انہاں آکھیے میں تساکوں تساڈے مسئلیں کوں مکاوݨ اچ مدد کریساں ۔وفاقی وزیر قومی خزانے تے مالی ٻوجھ گھٹ کرݨ تے سٹیل دی صنعت اچ خود انحصاری کوں ودھاوݨ کیتے مقامی طور تے خام مال دی اہمیت تے زور ݙتا ۔ ڈاکٹر گوہر اعجاز سارے شعبیں اچ ویلیو ایڈیشن دی لوڑھ تے زور ݙتے اتے پاکستان دی برآمدات دی مسابقت ودھاوݨ تے منصوبیں دا خاکہ پیش کیتے ۔ انہاں آکھیے اساں آپݨی برآمدات کوں مسابقتی بݨیسوں تے انہاں صنعتاں تے توجہ ݙیسوں جنہاں اچ پاکستان کوں تقابلی فیدہ ملدے ۔ ایں توں انڄ انہاں سٹیل دی صنعت ماچ ترقی ودھاوݨ کیتے نویاں منڈیاں ڳولݨ دا عہد کیتا ۔ ڈاکٹر اعجاز وفد کوں یقین ݙیوائے جو ݙوجھے ملکاں نال بی ٹو بی معاملات دے ذریعے ترقی اچ سہولت ݙیوݨ توں سبسڈی یا ترجیحی ٹیکس لاوݨ دی لوڑھ مک ویسی جیں توں خود کفیل ترقی تھیسی ۔سٹیل انڈسٹری دے نمائندیں آپݨے کماں کیتے سستی توانائی دی اہمیت تے زور ݙتا ۔ وزیر ڈاکٹر اعجاز مثبت جواب ݙیندے ہوئیں وفد کوں وزیر توانائی دے تعاون دا یقین ݙیوائے۔
