اسلام آباد۔8 مارچ(اے پی پی)پیس اینڈ کلچر آرگنائزیشن دے چیئرپرسن مشعال حسین ملک نریندر مودی دی فاشسٹ حکومت تے سخت تنقید کریندے آکھیے جو بھارت اچ فاشسٹ مودی حکومت کشمیری تریمتیں دی عصمت دری کوں کشمیریاں دی تذلیل اتے جدوجہد دباوݨ دے ہتھیار دے طور تے استعمال کریندی پئی اے۔ نیشنل یونیورسٹی آف ماڈرن لینگویجز اسلام آباد اچ تریمتیں دے عالمی ݙینھ تے سیمینار نال الیندے انہاں آکھیا جو اویں تاں ہر کشمیری بھارتی ریاستی دہشت گردی دا شکار اے ٻھل تریمتیں کوں بدترین تشدد ٻھوڳݨا پوندے، مقبوضہ جموں و کشمیر تے قابض افواج، پولیس، نیم فوجی دستے اتے ایجنسیاں کشمیری تریمتیں تے ظلم دے پہار ترڑینداں پن اتے ایں بدترین ظلم وادی دے واسیان کیتے جیوݨ اوکھا کر ݙتے۔ انہاں وادی اچ جاری تحریک آزادی اچ بہادر کشمیری خواتین کوں انہاں دی عظیم قربانیاں تے خراج عقیدت پیش کریندے آکھیے جو ہزاراں خواتین شہید تھین، جنوری 2001 توں ہݨ تئیں 682 خواتین کوں فوجیاں شہید کیتے ٻھل فاشسٹ حکام بہادر خواتین دی ہمت نئیں تروڑ سڳیے، صورتحال اتنی سنگین اے جو بھارتی فوجیاں 22,958 توں ودھ تریمتیں کوں بیوہ اتے 11,256 دی عصمت دری کیتی اے۔ انہاں آکھیا جو پچھلے 34 سالاں اچ 8000 توں ودھ کشمیری زیر حراست لاپتہ تھین، کئی ماواں اپݨے لاپتہ پتراں دی تانڳھ اچ مر گئن ٻھل بھارت دی ہٹ دھرمی برقرار اے، ڄڳ کوں مقبوضہ وادی اچ بھارتی مظالم دا نوٹس ڳھنݨا چاہیدے۔
