راولپنڈی۔18دسمبر (اے پی پی):پاکستان ریلوے 23 دسمبر توں راولپنڈی توں کراچی پاکستان ایکسپریس ریل ڳاݙی ول شروع کرݨ کیتے تیاریاں مکمل کرڳھدن ۔ پاکستان ریلوے راولپنڈی ڈویژن دے حکام اے پی پی نال ڳالھ مہاڑ کریندے ہوئیں ݙسائے جو پاکستان ریلوے عوام دے مطالبے تے پاکستان ایکسپریس ریل ڳاݙی ول چلاوݨ دا فیصلہ کیتے ۔ انہاں آکھیے اے قدم وزیر ریلوے خواجہ سعد رفیق دی ہدایت تے چاتا ڳئے ۔ ایکسپریس ریل ڳاݙی راولپنڈی تے کراچی دے درمیان چلسی ۔انہاں مزید آکھیے پاکستان ایکسپریس دی ایڈوانس بکنگ شروع کر ݙتی ڳئٰ اے ۔عوام دی سہولت کوں سامݨے رکھیندے ہوئیں اکانومی کلاس کوچز دے نال ھک اے سی بزنس اتے ݙو اے سی معیاری اضافی ٻوڳھیاں وی پاکستان ایکسپریس نال رلائیاں ویسن ۔ اے ریل ڳاݙی اڄوکے مہینیں اچ ساوݨ دے مینھ تے سیلاب توں تھیوݨ آلی تباہی پاروں بند کرݙتی ڳئی ہئی ۔پاکستان ایکسپریس دی روانگی دا ویلھا راولپنڈی توں سویلے 6 وڄے ہوسی تے فیصل آباد، شورکوٹ، خانیوال، ملتان، بہاولپور، رحیم یار خان، خان پور کٹورہ، صادق آباد، روہڑی اتے حیدرآباد توں تھیندے ہوئیں اڳلے ݙینھ سویلے 8.40 وڄے کراچی پڄسی۔
