اسلام آباد۔27اکتوبر(اے پی پی) خواجہ غلام فرید چیئر مینجمنٹ کمیٹی اسلامیہ یونیورسٹی بہاول پور ولوں سلطان العاشقین قبلتہ العارفین عظیم صوفی شاعر حضرت خواجہ غلام فرید دے دینی، روحانی اتے امن وآشتی دے سنیہے کوں نویں پود تئیں پچاوݨ کیتے”وحدت الوجود دی ریت“ دے موضوع تے کثیر اللسانی قومی کانفرنس تھئی۔ سیمینار نال خطاب کریندے انجینئر پروفیسر ڈاکٹر اطہر محبوب وائس چانسلر اسلامیہ یونیورسٹی بہاول پور آکھیا جو ہر سال خواجہ فرید چیئر ولوں قومی کانفرنس، سیمینار، محفلِ سما تےکافی تھیندی اے، خواجہ فرید چیئر مینجمنٹ کمیٹی عظیم صوفی شاعر دے سنیہے کوں قومی و عالمی سطح تے اڳونہا کریندی پئی اے، فرید دی فکر و فلسفے دا ودھارا اتے نوجوان نسل کوں سنڄاپو کراوݨ دا کم جاری اے۔ وائس چانسلر اسلامیہ یونیورسٹی بہاول پور دے مرکزی آڈیٹوریم خواجہ غلام فرید آڈیٹوریم نال موسوم کرݨ دا اعلان کیتا۔ سجادہ نشین دربارِ فرید خواجہ معین الدین محبوب کوریجہ اسلامیہ یونیورسٹی بہاول پور ولوں صوفیا دی تعلیمات دی نشر واشاعت دے اقدامات ٻہوں قابل تحسین اتے ٻنھاں جامعات کیتے فیدہ مند قرار ݙیندے آکھیے جو اساں محبت اتے انسانی احترام دا سنیہا ودھیندے راہسوں۔ صاحبزادہ سلطان احمد علی عشقِ رسول، تصوف، وحی اتے الہام دے موضوع تے علامہ اقبال دی شاعری بارے تفصیلی الایا اتے احترامِ انسانیت، باہمی محبت، رواداری سودھا بئے اخلاقی پہلواں تے سوجھلا پاتا۔ ڈائریکٹر جنرل انفارمیشن براڈکاسٹنگ تے خواجہ غلام فریدؒ دے موضوع تے کئی کتاباں دے لکھاری سعید احمد شیخ آکھیا جو خواجہ غلام فرید دی ݙیݙھ سو سال پہلے دی شاعری اڄ وی اشابر اے، ایں سنیہے کوں پورے ڄق اچ کھنݙاوݨا چاہیدے۔ اعزازی ڈائریکٹر خواجہ فرید چیئر راول معین کوریجہ آکھیا جو کانفرنس و سیمینار سودھا خواجہ غلام فریدؒ دی تعلیمات سانڳے کتب دی اشاعت وی شروع کیتی ڳئی اے، اڄ ممبر خواجہ فرید چیئر ڈاکٹر عصمت اللہ شاہ دے کلامِ فرید دے موضوعاتی انتخاب رنگِ فرید دے ناں توں اتے مجاہد جتوئی دا لکھیا ہویا خواجہ فرید دا سوانحی خاکہ (کتاب) دی تقریب ڳھنݙ کھلائی وی تھیندی پئی اے ڄݙاں جو خواجہ فرید چیئر مینجمنٹ کمیٹی دی ویب سائٹ وی لانچ کیتی ویسی، خصوصی دستاویزی فلم اتے ٻئے منصوبیاں تے وی کم تھیندا پئے۔ کانفرنس اچ پروفیسر ڈاکٹر جاوید حسان چانڈیو ڈین فیکلٹی آف آرٹس اینڈ لینگوئجز، ڈاکٹر مہر خادم حسین، ڈائریکٹر سچل چیئر شاہ لطیف یونیورسٹی خیر پور، ڈاکٹر عصمت اللہ شاہ، ممبر خواجہ فرید چیئر، مجاہد جتوئی ماہر فریدیات وممبر فرید چیئر، ڈاکٹر سعدیہ کمال ممبر فرید چیئر، ڈاکٹر اسلم محمود ملک سکالر، خورشید احمد سعیدی وی خطاب کیتے۔ ایں توں پہلے خواجہ فرید کافی نائٹ اچ خطے دی عظیم گلو کارہ ثریا ملتانیکر کوں لائیف ٹائم اچیومنٹ ایوارڈ ݙتا ڳئے۔ انہاں دی صاحبزادی راحت ملتانیکر خواجہ فرید ؒ دی دھی کافیاں ڳا تے سما ٻدھیے۔ خواجہ فرید کانفرنس اچ ڈپٹی کمشنر بہاول پور زاہد پرویز وڑائچ، ایڈیشنل کمشنر فیصل عطا، سید تابش الوری، معززین شہر، اساتذہ کرام اتے طلباء وطالبات ودھ شرکت کیتی۔
.jpg)
.jpg)