چٹاگانگ ۔23اگست (اے پی پی) پاکستان دے وفاقی وزیر تجارت جام کمال خان اتے بنگلہ دیش دے مشیر تجارت ایس کے بشیر الدین ہک ݙینھ دے سرکاری دورے تے چٹاگانگ پُڄے، جتھاں ضلعی انتظامیہ اتے شاہ امانت انٹرنیشنل ایئرپورٹ دے حکام انہاں دا استقبال کیتا۔ دورے دے دوران وفد چٹاگانگ چیمبر آف کامرس اینڈ انڈسٹری ( سی سی سی آئی) نال ملاقاتاں کیتیاں، بنگلہ دیشی شپ بریکنگ انڈسٹری اتے چٹاگانگ پورٹ دا معائنہ کیتا۔ ایں موقع تے کاروباری برادری نال براہ راست ڳالھ مہاڑ کیتی ڳئی، تجارتی تعاون دے نویں امکانات تے ڳالھ مہاڑ کیتی ڳئی اتے پاکستان و بنگلہ دیش وچال لاجسٹکس سہولتاں دے ودھارے دا وی جائزہ ڳھدا ڳیا۔ کاروباری برادری پاک۔بنگلہ دیش تجارتی تعلقات تے آپݨی قیمتی صلاح ݙتی اتے براہ راست پروازاں دی بحالی، ݙوہیں ملکاں وچال فری کوئنٹ شپنگ سروس اتے وپار دی ڈیجیٹلائزیشن متعلق تجویزاں ݙتیاں۔ وفاقی وزیر اتے بنگلہ دیشی مشیر ایں موقع تے آکھیا جو وختی پاکستان اتے بنگلہ دیش وچال جوائنٹ ورکنگ گروپ آن ٹریڈ قائم کیتا ویندا پئے جیڑھا تجارتی مذاکرات کیتے ہک ادارہ جاتی فریم ورک ݙیسی۔ ایں دے علاوہ ریڈی میڈ گارمنٹس، زرعی شعبے، ہیلتھ کیئر، لیدر اتے ضروری چیزاں اچ تعاون دے موقع تے وی ڳالھ تھئی۔ ݙوہیں رہنماواں ایں ڳالھ تے اتفاق کیتا جو پاکستان اتے بنگلہ دیش وچال وپار اتے سرمایہ کاری دے وسیع امکانات موجود ہن۔ انہاں کاروباری برادری کوں کراچی اچ 25 توں 27 نومبر 2025ء کوں منع??د تھیوݨ آلی “تریجھی بین الاقوامی فوڈ اینڈ ایگریکلچر نمائش” اچ شرکت دی دعوت ݙتی۔ ایں توں انڄ افریقہ اتے وسطی ایشیا کوں سانجھے طور تے برآمدات دے امکانات تے وی غور کیتا ڳیا اتے پاک۔بنگلہ دیش ٹریڈ اینڈ انویسٹمنٹ روڈ میپ دی تشکیل تے ڳالھ مہاڑ کیتی ڳئی۔ جام کمال خان اتے ایس کے بشیر الدین کبیر شپ ری سائیکلنگ فسیلٹیز دا وی دورہ کیتا، جتھاں انہاں کوں ݙوہیں ملکاں وچال جہاز سازی، شپ بریکنگ اتے ری سائیکلنگ ??ے شعبیں اچ تعاون دی گنجائش دے بارے بریفنگ ݙتی ڳئی۔ چٹاگانگ پورٹ اتھارٹی دے چیئرمین وفد کوں پورٹ دی تاریخ، آپریشنز، جاری منصوبیں اتے “سنگل ونڈو آپریشنز” سودھے وپار دی ڈیجیٹلائزیشن متعلق تفصیل ݙسائی۔
