اسلام آباد۔27ستمبر (اے پی پی) اسپیکر قومی اسمبلی سردار ایاز صادق آکھیے جو سیاحت کہیں وی ملک دی معاشی، سماجی اتے ثقافتی ترقی اچ ریڑھ دی ہݙی دی حیثیت رکھیندی اے، پاکستان اچ سیاحت دے ودھارے نال نہ صرف ملکی معیشت کوں استحکام ملسی بلکہ روزگار دے بے شمار موقع وی پیدا تھیسن، عوامی خوشحالی ودھسی اتے دنیا بھر اچ پاکستان دا مثبت اتے روشن چہرہ اجاگر تھیسی۔اے ڳالھ اسپیکر قومی اسمبلی سردار ایاز صادق عالمی یوم سیاحت دے موقع تے آکھی جیڑھا 27 ستمبر کوں دنیا اچ منایا ویندے۔ اسپیکر قومی اسمبلی آکھیا جو پاکستان آپݨی جغرافیائی تنوع، قدرتی حسن، قدیم تہذیباں اتے مذہبی و ثقافتی ورثے دی بدولت دنیا دے سیاحواں دی توجہ دا مرکز اے۔ انہاں آکھیا جو پاکستان دی سنڄاݨ صرف اُچیاں چوٹیاں، صحراواں اتے ساحلی علاقیں تئیں محدود کائنی بلکہ وادی کالاش دی روایتاں، گندھارا تہذیب دی شان و شوکت اتے کرتارپور کوریڈور جیھے روحانی مراکز ایں کوں دنیا دے مذاہب اتے ثقافتاں کیتے پرکشش بݨیندن۔اسپیکر قومی اسمبلی آکھیا جو حکومت مذہبی سیاحت دے ودھارے کیتے جامع ویزا پالیسی اپنائی اے جیں دے تلے سکھ، ہندو اتے بدھ مت دے منݨ آلے لوکاں کیتے مقدس جہیں تئیں رسائی سوکھی بݨائی ڳئی اے۔ انہاں آکھیا جو اے اقدامات نہ صرف بین المذاہب ہم آہنگی اتے مذہبی احترام کوں ودھارا ݙیندن بلکہ پاکستان دے پرامن اتے مہمان نواز تشخص کوں عالمی سطح تے اجاگر کریندن۔انہاں آکھیا جو سیاحت دے ودھارے کیتے امن و امان بنیادی حیثیت رکھیندے۔ اسپیکر ملک اچ امن قائم رکھݨ کیتے پاک فوج، قانون نافذ کرݨ آلے اداریں اتے عوام دیاں کوششاں کوں خراجِ تحسین پیش کیتا۔ اسپیکر سردار ایاز صادق وفاقی تے صوبائی حکومتاں، نجی شعبے اتے متعلقہ حکام تے زور ݙتا جو سیاحت دے ودھارے کیتے رَل تے حکمت عملی اپنائی ونڄے تاں جو پاکستان دے قدرتی اتے ثقافتی خزانے کوں عالمی سطح تے متعارف کرایا ونج سڳے۔ انہاں آکھیا جو کے ٹو دیاں برف پوش چوٹیاں توں گھن تے شندور دے ساریں توں اُچے پولو گراؤنڈ تئیں، پرسکون جھیلاں توں وݙے صحراواں تئیں پاکستان مہم جوئی اتے فطرت نال پیار کرݨ آلے لوکاں کیتے جنت نظیر اے۔اسپیکر قومی اسمبلی آکھیا جو موجودہ پارلیمنٹ پائیدار سیاحت کوں ودھارا ݙیوݨ کیتے پرعزم اے تاں جو سماجی انصاف، معاشی موقع، ثقافتی ترقی اتے قومی اتحاد کوں یقینی بݨایا ونج سڳے۔ انہاں ایں عزم دا اظہار کیتا جو سیاحت دے ودھارے دے ذریعے اساں ہک پرامن، خوشحال اتے ترقی یافتہ پاکستان دی بنیاد رکھ سڳدوں۔ڈپٹی سپیکر قومی اسمبلی سید غلام مصطفیٰ شاہ آپݨے پیغام اچ آکھیے جو سیاحت نہ صرف معاشی ترقی دا ذریعہ اے بلکہ اے مقامی آبادیاں کیتے سدھے فیدے اتے سماجی توازن دا وی سبب بݨدی اے۔ انہاں آکھیا جو ایجھا ماڈلز اپناوݨ دی لوڑھ اے جنہاں توں مقامی کمیونٹیز کوں ودھ توں ودھ فیدہ پڄے۔ ڈپٹی سپیکر مزید آکھیا جو مذہبی سیاحواں کیتے حکومت دیاں سہولتاں اتے انتہاپسندی مکاوݨ کیتے جاری سلامتی اقدامات پاکستان دے روشن مستقبل دی ضمانت ہن۔ انہاں ایں ڳالھ تے زور ݙتا جو مشترکہ ثقافتی ورثے دے تحفظ اتے ودھارے کیتے سرکاری و نجی شعبے اچ مزید تعاون ودھایا ونڄے تاں جو قومی ترقی اتے عالمی تشخص کیتے سیاحت دے ایں اہم موقع توں بھرپور فیدہ چایا ونڄ سڳے
.jpg)
.jpg)
.jpg)
