اسلام آباد، 19 ستمبر (اے پی پی) ڈائریکٹر جنرل انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری آکھیے جو ایں ڳالھ دے پکے ثبوت موجود ہن جو غیر قانونی افغان شہری پاکستان اچ دہشت گردی اتے سنگین جرماں اچ ملوث ہن۔ہک جرمن میگزین کوں انٹرویو ݙیندے ڈی جی آئی ایس پی آر آکھیا جو پاکستان 40 سال تئیں لکھاں افغان مہاجراں دی میزبانی کیتی۔ انہاں آکھیا جو پاکستان افغان مہاجراں دی آپݨے ملک اچ باعزت واپسی کیتے جامع انتظامات کیتے۔انہاں آکھیا جو پاکستان انسانی ہمدردی دی بنیاد تے افغان مہاجراں دی واپسی دی ڈیڈ لائن اچ کئی واری توسیع کیتی۔ انہاں آکھیا جو افغان مہاجراں کوں پناہ ݙیوݨ دی اصل وجہ غیر ملکی مداخلت اتے خانہ جنگی ہن، جیڑھے ہݨ موجود کائنی۔ڈی جی آئی ایس پی آر آکھیا جو امریکہ دے افغانستان توں نکلݨ دے بعد چھوڑئے ڳئے امریکی ہتھیار پاکستان اچ دہشت گردی دیاں سرگرمیاں اچ استعمال تھیندے پئن۔ انہاں مزید آکھیا جو اتھاں تئیں جو امریکہ وی انہاں ہتھیاراں دے دہشت گردی دیاں سرگرمیاں اچ استعمال تھیوݨ تے تشویش دا اظہار کیتے۔ہک سوال دے جواب اچ احمد شریف چوہدری آکھیے جو بھارت اچ پرتشدد واقعات بھارتی حکومت دی ودھدی انتہا پسند پالیسیاں دا نتیجہ ہن۔ انہاں آکھیا جو بھارت ہمیشہ آپݨے اندرلے مسئلیں کوں ٻاہرلے تے ٻاہرلے مسئلیں کوں اندرلے مسئلیں دے طور تے پیش کریندے۔ ڈی جی آکھیا جو بھارت ریاستی نگرانی اچ پاکستان اچ دہشت گردی دیاں سرگرمیاں اچ ملوث اے، اتے مزید آکھیا جو ایں طرح دیاں سرگرمیاں اچ کم کرݨ آلے بھارتی فوج دے افسراں دی شمولیت دے پکے ثبوت موجود ہن۔ انہاں ریمارکس ݙتے جو پاکستان کئی واری عالمی برادری دے سامݨے بھارتی دہشت گردی دے ثبوت وی پیش کیتن۔جݙاں انہاں توں کشمیر دے مسئلے دے بارے پچھیا ڳیا تاں انہاں عالمی برادری تے زور ݙتا جو او ایں پراݨے جھیڑے کوں حل کرݨ کیتے آپݨا کردار ادا کرے۔ انہاں ایں ڳالھ تے زور ݙتا جو پاکستان سارے غیر ریاستی عنصر کوں ہر حال اچ رد کریندے۔انہاں آکھیا جو پاکستان اچ کہیں وی مسلح گروپ کیتے کوئی جاہ کائنی ، اتے مزید آکھیا جو ریاست دے علاوہ کہیں وی گروپ یا فرد کوں جہاد دا اعلان کرݨ دا اختیار کائںی۔ڈی جی آئی ایس پی آر آکھیا جو پاکستان نہ صرف دہشت گردی دے خلاف جنگ اچ فرنٹ لائن سٹیٹ دا کردار ادا کیتے بلکہ بے انت قربانیاں وی ݙتن۔پاکستان۔بھارت دے اڄوکے جھیڑے ، مارکہ حق، دے دوران امریکی صدر ٹرمپ ہک اسٹریٹجک قائدانہ کردار ادا کیتا۔ انہاں آکھیا جو امریکہ کالعدم مجید بریگیڈ کوں ہک عالمی دہشت گرد تنظیم قرار ݙتے۔ہک ٻئے سوال دے جواب اچ ڈی جی آئی ایس پی آر آکھیا جو پاکستان دے آپݨے بھرا ملک چین دے نال تعمیری اتے اسٹریٹجک تعلقات ہن۔انہاں آکھیا جو بلوچستان اچ ماریے ڳئے کئی دہشت گرد نام نہاد لاپتہ لوکاں دی فہرست اچ شامل ہن۔
