اسلام آباد۔16ستمبر (اے پی پی) وزیراعظم محمد شہباز شریف ݙیجیٹلائزیشن کوں ویلھے دی لوڑھ قرار ݙیندیں ہوئیں آکھیا جو مشرق ڈیجیٹل بینک دا قیام پاکستان اچ کیش لیس کاروبار اتے مالیاتی شعبے دی ترقی اتے فروغ اچ سنگ میل ثابت تھیسی، نویں نسل ملک دی آبادی دا وݙا حصہ اے، اے نویں نسل اساݙے کیتے وݙا چیلنج اتے عظیم موقع اے، معیشت کوں پیپر لیس بݨاوݨ اتے ایں اچ انسانی عمل دخل گھٹ کرݨا پوسی۔ انہاں اے ڳالھ منگل کوں اتھاں پاکستان اچ مشرق ڈیجیٹل ریٹیل بینک دی افتتاحی تقریب توں خطاب کریندے ہوئیں آکھی۔ تقریب اچ وفاقی وزیر خزانہ محمد اورنگزیب، وفاقی وزیر منصوبہ بندی و ترقی احسن اقبال، وفاقی وزیر پٹرولیم علی پرویز ملک، وفاقی وزیر ریلوے حنیف عباسی، وفاقی وزیر بحری امور جنید انوار، گورنر سٹیٹ بینک جمیل احمد اتے سیکرٹری خزانہ امداد اللہ بوسال وی موجود ہن۔ وزیراعظم آکھیا جو پاکستان اچ ٻئے ڈیجیٹل بینک مشرق ڈیجیٹل بینک دا قیام خوش آئند اے، مشرق بینک دے مالکاں دا تعلق متحدہ عرب امارات نال اے اتے او ہمیشہ پاکستان دی معاشی اتے سماجی ترقی دے خواہاں رہین، پاکستان اتے متحدہ عرب امارات دے تعلقات کوں مضبوط بݨاوݨ اچ الغریر خاندان دا اہم کردار اے۔ وزیراعظم آکھیا جو مشرق ڈیجیٹل بینک دا قیام پاکستان اچ کیش لیس کاروبار اتے مالیاتی شعبے دی ترقی اتے فروغ اچ سنگ میل ثابت تھیسی، مشرق بینک دے چیف ایگزیکٹو آفیسر نویں ہن، پاکستان دی آبادی دا ہک وݙا حصہ نویں نسل تے مشتمل اے، اے نویں نسل ملک کیتے ہک وݙا چیلنج اتے عظیم موقع اے۔ انہاں آکھیا جو گورنر سٹیٹ بینک باصلاحیت شخصیت ہن، نویں مانیٹری پالیسی اچ پالیسی ریٹ برقرار رکھیا ڳئے، ملک اچ کاروباری، زرعی تے صنعتی سرگرمیاں اتے بینکاری نظام کوں فروغ ݙیوݨ دی لوڑھ اے۔ انہاں آکھیا جو اج دا ویلھا ݙیجیٹلائزیشن دا ویلھا اے اتے ݙیجیٹلائزیشن اتے جدید ٹیکنالوجی دے استعمال نال معیشت کوں ترقی ݙتی ونڄ سڳدی اے، معیشت کوں پیپر لیس بݨاوݨ اتے ایں اچ انسانی عمل دخل گھٹ کرݨا پوسی۔ انہاں آکھیا جو مشرق بینک ہک وݙا بینک اے اتے امید کریندوں جو پاکستان اچ ݙیجیٹل بینک دے قیام نال مالیاتی شعبے اچ عوام کوں بہترین سہولتاں ݙیوݨ بارے وݙی تبدیلی آسی۔ ایں موقع تے وفاقی وزیر خزانہ محمد اورنگزیب آکھیا جو وزیراعظم محمد شہباز شریف دی قیادت اچ حکومت ملک اچ اقتصادی استحکام کیتے کوشاں اے، ترسیلات زر پاکستان دی لائف لائن ہن، بین الاقوامی ریٹنگ ایجنسیز وی پاکستان دی چنڳی معاشی کارکردگی دی تصدیق کیتی اے جئیں نال اے ثابت تھیندے جو پاکستان دی معیشت سدھے پاسے ویندے پئی اے، اے ہک آغاز اتے اساں ٻیا اڳوں ڳھن ونجݨے۔ انہاں آکھیا جو اج دی حکومت ڈھانچہ جاتی اصلاحات متعارف کریندی پئی اے، توانائی، بینکاری نظام اتے ایس او ایز دے حوالے نال مختلف اقدامات کیتے ویندے پئن، اساں پالیسیاں دے تسلسل کوں یقینی بݨیسوں، مشرق ڈیجیٹل بینک دی پاکستان دے مالیاتی شعبے اچ شمولیت خوش آئند اے، امید اے مشرق ڈیجیٹل بینک پاکستان اچ عوام کیتے بہترین سہولتاں متعارف کریسی۔ مشرق بینک دے چیئرمین عبدالعزیز الغریر آکھیا جو مشرق بینک پاکستان اچ آپݨا مالیاتی سفر شروع کریندا پئے، پاکستان دی حکومت وزیراعظم محمد شہباز شریف دی قیادت اچ ملک اچ اصلاحات، معاشی ترقی اتے غیر ملکی سرمایہ کاری کیتے کوشاں اے، اساں کوں ایں عمل دا حصہ بݨݨ تے فخر اے، ݙیجیٹل ریگولیٹری فریم ورک دے تحت سٹیٹ بینک دے اقدامات قابل تحسین ہن، اساں پہلے مکمل ݙیجیٹل بینک دے قیام کیتے پاکستان دا انتخاب کیتے، پاکستان جغرافیائی محل وقوع اتے کاروباری تے مالیاتی سرگرمیاں کیتے بہتر ماحول پاروں ڈیجیٹل اکنامک پاور ہائوس بݨݨ دی صلاحیت رکھیندے، اساں پاکستان اچ بہترین مالیاتی سہولتاں تئیں رسائی کوں یقینی بݨیسوں، اساں صرف پاکستان اچ ݙیجیٹل بینک ای قائم نی کریندے پئے بلکہ ایں دی ترقی دے پندھ اچ شریک تھین۔ مشرق بینک دے چیف ایگزیکٹو آفیسر محمد ہمایوں سجاد آکھیا جو گزریل ورھے پاکستان اچ ڈیجیٹل ادائیگیاں اچ 30 فیصد ودھارا تھیے، نویں نسل مالیاتی شعبے دا ڈیجیٹل مستقبل ہن، ݙیجیٹل بینکاری دے فروغ اتے سائبر سکیورٹی کیتے سٹیٹ بینک دے اقدامات قابل تحسین ہن۔ ایں موقع تے وزیراعظم محمد شہباز شریف اتے چیئرمین مشرق بینک عبدالعزیز الغریر پاکستان اچ مشرق ڈیجیٹل ریٹیل بینک دا باقاعدہ افتتاح کیتا۔
