اسلام آباد۔22ستمبر (اے پی پی) چیئرمین سینیٹ سید یوسف رضا گیلانی آکھیے جو پاکستان آسٹریلیا دے نال آپݨے تعلقات کوں قدر نال ݙیکھدےِ، پارلیمانی دوستی گروپاں کوں بہوں فعال بݨایا ونجے، پارلیمانی وفداں دے باقاعدہ تبادلیاں نال ݙوہیں ملکاں وچال اتفاق اتے چنڳائی کوں ودھاوا ملسی۔ سنوار کوں سینیٹ سیکرٹریٹ توں جاری بیان دے مطابق ایجھی سوچ دا اظہار انہاں آسٹریلیا دے ہائی کمشنر نیل ہاکنز نال ملاقات دے دوران کیتا جنہاں سنوار کوں اتھاں انہاں نال ملاقات کیتی۔ ملاقات اچ ݙوپاسے تعلقات کوں ٻیا ودھاوݨ اتے مختلف شعبیاں اچ نویں موقعے ڳولݨ تے تفصیلی ڳالھ مہاڑ کیتی ڳئی۔ ایں موقعے تے تجارت، تعلیم، دفاع، پارلیمانی تعاون، ثقافتی تبادلے، موسم دی تبدیلی اتے عوام دی سطح تے رابطے سویں اہم موضوع تے ڳالھ کیتی ڳئی۔ چیئرمین سینیٹ آکھیے جو پاکستان آسٹریلیا دے نال آپݨے تعلقات کوں قدر نال ݙیکھدےِ۔ انہاں پاکستان اتے آسٹریلیا دے تاریخی تعلقات کوں نمایاں کریندیں ہوئیں آکھیے جو ݙوہائیں ملکاں وچال 1948ء اچ سفارتی تعلقات قائم تھئے ہن جیڑھے وقت دے نال ٻئے مضبوط تھئن۔ انہاں آکھیے جو پاکستان اتے آسٹریلیا جمہوری اقدار اتے ݙو ایوانی پارلیمانی نظام دیاں سانجھیاں روایتاں رکھیندے ہن جیڑھے مزید قریبی تعاون دی بنیاد ݙیندن۔آسٹریلوی ہائی کمشنر پاکستان اچ اڄوکے سیلاب دے نتیجے اچ قیمتی جاناں اتے جائیداد دے ضیان تے بہوں ݙکھی اتے ہمدردی دا اظہار کیتا اتے ہر ممکن مدد دا یقین ݙوایا۔چیئرمین سینیٹ ہائی کمشنر کوں آپݨے اڄوکے دورہ جنوبی پنجاب بارے اچ وی ݙسایا جتھاں سیلاب ہزاراں لوکاں کوں بے گھر کر ݙتے ۔ انہاں فلاحی اداریاں اتے خیرات ݙیوݨ آلیاں توں متاثرین دی فوری مدد دی اپیل کیتی۔ایں موقعے تے چیئرمین سینیٹ آسٹریلوی ہائی کمشنر کوں آئندہ بین الپارلیمانی سپیکرز کانفرنس (آئی ایس سی ) بارے اچ وی بریفنگ ݙتی جیڑھی ایں سال نومبر اچ تھیسی۔ انہاں آسٹریلوی پارلیمانی قیادت کوں ایں کانفرنس اچ شرکت دی باضابطہ دعوت ݙتی اتے آکھیے جو انہاں دی شرکت کانفرنس دی کامیابی کیتے بہوں اہم ہوسی۔ کانفرنس دی سفیر اتے چیئرمین سینیٹ دی مشیر مصباح کھر ہائی کمشنر کوں کانفرنس دے موضوع اتے ایںدے سارے مقصد دا ݙسایا۔ملاقات دے چھیکڑ اچ ݙوہیں راہنماواں پاکستان اتے آسٹریلیا دے تعلقات کوں ٻیا مضبوط بݨاوݨ اتے عالمی اتے علاقائی امن کیتے سانجھی کوششاں جاری رکھݨ دا ارادہ کیتا۔
