جدہ۔25اگست(اے پی پی)نائب وزیر اعظم اتے وزیر خارجہ محمد اسحاق ڈار فلسطین بارے اسرائیل دے ٻہوں اشتعال انگیز اتے خطرناک بیانات دی شدید مذمت کریندے پاکستان ولوں فوری اتے موثر جنگ بندی دے مطالبے کوں دوہریندے ہوئے 7 اہم اقدامات دی تجویز ݙتی اتے آکھیے جو اسرائیل دا فلسطینی زمین تے قبضہ غیر قانونی اے، ڄے تئیں اے قبضہ نئیں مکدا امن نئیں تھی سڳدا۔ او آئی سی وزرائے خارجہ دی کونسل دے 21ویں غیر معمولی اجلاس اچ آپݨے بیان اچ نائب وزیر اعظم اتے وزیر خارجہ پاکستان ولوں فوری اتے موثر جنگ بندی دے مطالبے کوں دوہرایا۔ انسانی امداد یقینی بݨاوݨ، جبری نقل مکانی مکاوݨ، غیر قانونی آبادکاری دی توسیع اتے الحاق، فلسطینیاں دے خلاف جرائم اتے بین الاقوامی جرائم مکاوݨ سودھا انسانی حقوق دیاں خلاف ورزیاں تے عمل درآمد کرݨ تے زور ݙتے۔ انہاں آکھیا جو اے اجلاس ݙو واری تھئے جݙاں غزہ اچ خون وہایا ڳیا، منظم، پہلے توں طے شدہ اتے ڄاݨ ٻڄھ تے بین الاقوامی قوانین بشمول بین الاقوامی انسانی قانون، اقوام متحدہ دی سلامتی کونسل دیاں قرارداداں اتے آئی سی جے دے فیصلے دی خلاف ورزی کیتی ڳئی، غزہ معصوم جاناں دے نال نال بین الاقوامی قانون خاص طور تے بین الاقوامی انسانی قانون دا قبرستان بݨ چُکیے، اسرائیل دے وحشیانہ فوجی حملے اچ 60 ہزار توں ودھ فلسطینی جیندے اچ زیادہ تر تریمتیں اتے بال ہن، مارے ونڄ چُکین، ہسپتالاں، سکولاں، اقوام متحدہ دیاں سہولتاں، امدادی قافلیاں اتے پناہ گزیناں دے کیمپاں کوں منظم طریقے نال نشانہ بݨاوݨ اتفاقی نئیں، اے پورے ڄڳ موجب اجتماعی سزا دے غیر مہذب کم ہن۔ انہاں آکھیا جو غزہ ہک وݙے پیمانے تے انسانی تباہی دا سامݨا کریندا پئے، تقریباً ݙو سالاں توں اے اندھا دھند بمباری، مکمل ناکہ بندی اتے ڄاݨ ٻڄھ تے محرومی اتے بُکھ دا شکار اے جݙاں جو مغربی کنارے اتے یروشلم اچ تشدد اتے بے دخلی ودھدی پئی اے، قبضہ کرݨ آلی طاقت دا نام نہاد انسانی نظام ہک ظالمانہ فریب اے، غزہ اچ کریہہ انتہا تے اے، خوراک کٹھی کرݨ دی کوشش کرݨ آلے شہریاں کوں گولی ماری ویندی پئی اے، غزہ اچ بکھ دا بحران ٻہوں وݙے چنتے دی حد تئیں پڄ چکیے۔ انہاں آکھیا جو اسرائیل نے بین الاقوامی اصولاں سانڳے آپݨی مخصوص غیر حساسیت ݙکھیندا پئے، اڄوکے ݙینہاں اچ اسرائیل ولوں ٻہوں سارے ودھ اشتعال انگیز اتے غیر ضروری بیانات سامݨے آئن جیندے نال بین الاقوامی نظام کیتے ایںدی ودھدی نفرت ݙسدی اے۔ انہاں آکھیا جو پاکستان انہاں ودھدے اتے خطرناک بیانات دی شدید مذمت کریندے اتے مطالبہ کریندے جو خطے اچ امن و استحکام سانڳے بین الاقوامی کوششاں کوں نقصان پُجاوݨ دے علاوہ مقبوضہ فلسطینی علاقے اچ موجودہ سنگین انسانی صورتحال اتے شہریاں دیاں مصیبتاں ٻیاں ودھیسن۔ انہاں آکھیا جو پاکستان ݙوجھے ملکاں نال عرب اسلامی وزارتی کمیٹی دے جاری بیان اچ رلیے جیندے اچ اسرائیلی اعلان دی شدید مذمت اتے کھلا ردعمل ݙتا ڳئے، ایکوں ناقابل قبول ودھارا اتے جبر دے ذریعے غیر قانونی قبضے دی ڈھٹائی دی کوشش قرار ݙتے۔ انہاں آکھیا جو پاکستان 31 عرب اسلامی ملکاں دے نال نال او آئی سی دے سیکرٹری جنرلز، لیگ آف عرب سٹیٹس اتے گلف کوآپریشن کونسل دے جاری کیتے ڳئے بیان دی وی مکمل حمایت کیتی اتے ایںدے اچ شمولیت اختیار کیتی جیںدے اچ نام نہاد ‘گریٹر اسرائیل’ دے قیام کیتے اسرائیلی وزیر اعظم دے اشتعال انگیز بیان دی مذمت کیتی ڳئی۔ انہاں آکھیا جو اے بیان قومی سلامتی کیتے سدھا خطرہ اتے عرب ریاست دی تشکیل کیتے ہک سنگین خطرہ اے۔ انہاں آکھیا جو پاکستان دے وزیر اعظم واضح کر ݙتا ہئی جو ایں جاری المیے دی بنیادی وجہ اسرائیل دا فلسطینی زمین تے لمبا، غیر قانونی قبضہ اے، ڄے تئیں اے قبضہ رہسی، امن قائم نئیں تھی سڳدا۔ اسحاق ڈار دوہرایا جو پاکستان فلسطینیان دی آزادی اتے علاقائی سالمیت کوں لاحق خطرات دے خلاف انہاں دی خودمختاری دے تحفظ اچ آپݨے ٻھرا عرب ریاستاں دے نال کھرے، پاکستان غزہ اچ امن کوں ودھاوݨ اچ کردار ادا کرݨ آلیاں ساریاں ریاستاں اتے سٹیک ہولڈرز کوں خراج تحسین پیش کریندے۔ اسحاق ڈار آکھیا جو پاکستان فلسطینی ریاست اتے اقوام متحدہ دی مکمل رکنیت دی حمایت اچ ودھدی بین الاقوامی رفتار دا وی خیرمقدم کیتے اتے انہاں ریاستاں تے زور ݙتا جنہاں ہݨ تئیں فلسطین دی ریاست کوں نئیں منیا، او تیکھے ایکوں من ڳھنن۔ انہاں آکھیا جو فلسطینی عوام کوں ہمدردی دی بجائے آپݨیاں مصیبتاں مکݨ اتے اسرائیلی قبضے توں آزادی دی لوڑھ اے، او آئی سی کوں اتحاد، پکے ارادے اتے مقصد نال ایں چیلنج دا مقابلہ کرݨا چاہیدے، ہک ٻئے نکبہ دی اجازت نئیں ݙتی ونڄ سڳدی، فلسطینی عوام دے حقوق کوں برقرار رکھݨ اچ ناکامی نال استثنیٰ کوں تقویت ملسی اتے اوں ہی حکم دی قانونی حیثیت کوں نقصان پُجسی جیںدا اساں سارے دفاع اتے برقرار رکھݨ دا دعویٰ کریندے ہیں۔ انہاں آکھیا جو “اسرائیل دا غزہ شہر تے قبضے دا اعلان فلسطینیاں دے وجود اتے ورثے کوں مٹاوݨ دی ڄاݨ ٻڄھ کے کیتی ڳئی کوشش ہوسی جیندی سختی نال مخالفت کیتی ونڄݨی چاہیدی اے۔ پنجویں غزہ کیتے عرب اتے او آئی سی دی اڳواݨی اچ نویں تعمیر دے منصوبے دا نفاذ جیڑھا تنازعے دے بعد بحالی، پائیدار ترقی اتے فلسطینی عوام دے وقار دی بحالی کیتے ہک اہم فریم ورک دی نمائندگی کریندے۔ بین الاقوامی قانون اتے متعلقہ اقوام متحدہ اتے او آئی سی دیاں قرارداداں دے مطابق ہک منصفانہ، جامع اتے دیرپا ݙو ریاستی حل سانڳے ہک حقیقی اتے وقتی سیاسی عمل دی بحالی ضروری اے۔ انہاں آکھیا جو او آئی سی کوں انصاف ݙیوݨ اتے استثنیٰ دے کلچر کوں مکاوݨ کیتے میکانزم دی حمایت کرݨی چاہیدی اے، عالمی امن اتے سلامتی دی بنیادی ذمے داری اقوام متحدہ دی سلامتی کونسل تو تھیندی اے ڄیکر اسرائیل بین الاقوامی برادری دے مطالبے اتے مرضی توں انکار کریندے تاں ایںدی قیمت ادا کرے۔ انہاں آکھیا جو کونسل کوں غزہ اچ گھری آبادی کوں بچاوݨ کیتے بین الاقوامی حفاظتی فورس دی تعیناتی سودھا نفاذ دے اقدامات کوں نافذ کرݨا چاہیدے۔ اسحاق ڈار آکھیا جو فلسطین پاکستان دی ترجیح اے، اقوام متحدہ دی سلامتی کونسل دے غیر مستقل رکن دے طور تے پاکستان فلسطینیاں دے حق خود ارادیت، انصاف اتے امن کیتے عالمی حمایت کوں متحرک کرݨ کیتے او آئی سی اتے عرب شراکت داراں دے نال کم جاری رکھسی۔ انہاں آکھیا جو فلسطینی علاقیاں تے اسرائیل دے ناجائز قبضے کوں ختم کرݨ کیتے بنیادی وجہ کوں حل کرݨ اتے ایںدے نال نبڑݨا ٻہوں ضروری اے، مشرق وسطیٰ اچ منصفانہ اتے پائیدار امن دے حوالے نال اساݙے سانجھے عزم دے اعادے کیتے ہک قابل اعتبار اقدام دا ویلھا اے
.jpg)
