ملتان۔ 09 ستمبر (اے پی پی) جلالپور پیروالا اچ سیلاب توں متاثرہ علاقیں اچ ریسکیو سرگرمیاں جاری ہن، اج سویر 6 وجے توں ہݨ تئیں 400 توں ودھ بندیاں کوں مختلف وستیاں توں کݙھ تے محفوظ جاہیں تے منتقل کیتا ڳئے ۔ کمشنر ملتان ڈویژن عامر کریم خاں متاثرہ علاقیں دا دورہ کیتا اتے ریسکیو آپریشن دا تفصیلی جائزہ ڳھدا۔ ایں موقع تے انہاں ݙسایا جو سیلاب اچ پھتے شہریاں کوں محفوظ جاہیں تے منتقل کرݨ کیتے سارے ادارے پورے زور نال کوششاں کریندے پئن اتے ریسکیو عملے دی ݙینھ رات دی کوششاں قابل تعریف ہن۔ کمشنر موجب صرف اج سویر 6 وجے توں ہݨ تئیں 400 توں ودھ بندیاں کوں مختلف وستیاں توں کݙھ تے محفوظ جاہیں تے منتقل کیتا ڳئے اتے گزریل ݙینھ ہک ݙینھ اچ ساݙھے چار ہزار توں ودھ متاثرین کوں ریسکیو کیتا ڳیا ہا۔ انہاں آکھیے جو اے ریسکیو سرگرمیاں متاثرہ لوکاں دی زندگیاں محفوظ بݨاوݨ کیتے جاری رہسن اتے ہک وی شہری کوں بے یار و مددگار نہ چھوڑیا ویسی، انہاں ٻیا ݙسایا جو حکومت پنجاب ولوں سیلابی صورتحال دی ہر ویلھے مانیٹرنگ کیتی ویندی پئی اتے امدادی سرگرمیاں اچ ٻیا تکھا کرݨ دی ہدایت جاری کیتی ڳئی اے۔ کمشنر عامر کریم خاں واضح کیتے جو سارے متاثرین دی محفوظ جاہیں تے منتقلی تئیں ریسکیو آپریشن بغیر رُکے جاری رہسی تاںجو ہک وی جانی نقصان توں بچیا ونڄ سڳے۔
.jpg)
