اسلام آباد۔20ستمبر(اے پی پی) اسپیکر قومی اسمبلی سردار ایاز صادق آکھیے جو پائیدار امن دے قیام کیتے عالمی اتحاد، برداشت تے مکالمہ ناگزیر ہن۔ انہاں آکھیا جو امن انسانیت دی فلاح تے ترقی کیتے بنیادی حیثیت رکھیندے تے سارے جھیڑیں دا حل صرف مذاکرات نال ممکن اے۔ اے ڳالھ انہاں ہفتے کوں امن دے عالمی ݙینھ دے موقع تے آکھی جیڑھا ہر سال اقوام متحدہ دے زیر اہتمام 21 ستمبر کوں منایا ویندے۔ انہاں آکھیا جو اڄوکے سال دا موضوع “امن دے قیام کیتے فوری اقدام چاؤ” ویلھے دی اہم لوڑھ اے ۔ اسپیکر قومی اسمبلی سفارتکاری کوں پائیدار امن دے قیام دا بنیادی جزو قرار ݙیندے آکھیا جو دنیا دے ملکاں دی قیادت کوں چاہیدے جو تصادم دی بجائے مکالمے، فہم و فراست تے سانجھے احترام کوں ترجیح ݙیون۔ انہاں دا آکھݨ ہئی جو امن طاقت یا جبر دے ذریعے حاصل نی کیتا ونڄ سڳدا، بلکہ اے صرف انصاف، تعاون تے احترام تے مبنی رویں نال قائم رہندے۔ اسپیکر قومی اسمبلی آکھیا جو امن صرف جنگ دے نہ تھیوݨ دا ناں کائنی، بلکہ ایندی بنیاد عدل، ہم آہنگی تے سانجھے احترام تے ہوندی اے۔ انہاں عالمی برادری تے امن دے بنیادی اصول، انسانی حقوق دے تحفظ تے مساوات دے ودھارے کوں ہر سطح تے اپݨاوݨ دی ضرورت تے زور ݙتا۔ انہاں مزید آکھیا جو پاکستان ایں سال دے موضوع تے عملدرآمد کریندے متعدد عملی اقدامات کیتن۔ قومی اسمبلی تے سینیٹ متفقہ قرارداداں دے ذریعے نہ صرف فلسطین تے اسرائیلی جارحیت تے جنگی جرائم دی شدید مذمت کیتی اے بلکہ فلسطینی عوام دے اصولی موقف حق خود ارادیت دی بھرپور حمایت وی کیتی اے۔ ایویں ہی، ݙوہیں ایواناں کشمیری عوام دی جدوجہد آزادی دی غیر متزلزل حمایت دا اعادہ کریندے بھارت دی جارحانہ پالیسیاں تے یکطرفہ طور تے آرٹیکل 370 تے 35-اے دے خاتمے دی شدید الفاظ وچ مذمت کیتی اے، جنہاں دے نتیجے وچ کشمیریاں کنوں انہاں دی منفرد شناخت کھسݨ دی سازش کیتی ڳئی۔ اسپیکر قومی اسمبلی دا آکھݨ ہئی جو انہاں پارلیمانی اقدامات دے ذریعے پاکستان اقوام متحدہ دے پیغام تے لبیک آکھیے تے دنیا کوں اے پیغام ݙتے جو اومظلوم اقوام دے نال کھڑے۔ اسپیکر قومی اسمبلی اسرائیل دی طرفوں قطر، شام، لبنان تے ایران تے کیتی ڳئی جارحیت کوں سخت الفاظ نال مسترد کریندے انہاں حملیں کوں بے بنیاد، بلاجواز، مذکورہ ملکاں دی خودمختاری تے بین الاقوامی قوانین دی کھلی خلاف ورزی قرار ݙتا۔ انہاں دا آکھݨ ہئی جو اسرائیل دا جنگی جنون، فلسطینی ٻالاں، عورتاں، بزرگاں تے مریضاں دا قتل عام، تے امدادی سامان دی بندش انسانیت دے خلاف جرائم دے زمرے وچ آندن۔ اسپیکر سردار ایاز صادق ایں عزم دا اعادہ کیتا جو پاکستان مظلوم فلسطینیاں تے کشمیریاں دی مکمل حمایت جاری رکھیسی۔ انہاں آکھیا جو فلسطینی علاقیں تے غیر قانونی قبضے تے کشمیری عوام تے جاری بھارتی مظالم کوں ختم کرݨ ویلھے دی اہم لوڑھ اے ۔ انہاں ایں امر تے زور ݙتا جو حق خود ارادیت دا حصول بنیادی انسانی حقوق دا مسئلہ اے تے بین الاقوامی برادری تے لازم اے جو او انہاں اقوام دی جدوجہد دی حمایت کرے تے انہاں خطیں وچ تھیندیاں انسانی حقوق دی سنگین پامالیاں دا نوٹس گھنے۔ اسپیکر قومی اسمبلی آکھیا جو پاکستان عالمی سطح تے امن دے ودھارے کیتے فعال کردار ادا کریندا پئے تے سارے علاقائی و بین الاقوامی فورماں تے جھیڑیں دے پرامن حل تے مکالمے دی اہمیت کوں اجاگر کریندا پئے۔ انہاں اقوام متحدہ تے عالمی برادری کنوں مطالبہ کیتا جو او کشمیریاں تے فلسطینیاں دے حق خود ارادیت دے حصول تے جھیڑیں دے پرامن حل کیتے اقوام متحدہ دی سلامتی کونسل دی قرارداداں موجب اپݨا کردار ادا کرن۔ انہاں آکھیا جو دنیا دے ملکاں کوں چاہیدے جو بین الاقوامی امن معاہدیں دی پاسداری کرن تے انہاں جھیڑیں کوں حل کرݨ کیتے رل تے کم کرن جیڑھے عالمی استحکام کوں خطرے وچ پا ݙیندن۔ انہاں دا آکھݨ ہئی جو امن دا قیام اجتماعی ذمہ واری اے جیں کوں ہر سطح تے اپنایا ونڄݨا چاہیدے۔
.jpg)
